Ukraynada müharibə yalnız o halda başa çata bilər ki, Putin hakimiyyətdən getsin. O, hakimiyyətdə qaldığı müddətcə müharibənin bitməsində maraqlı deyil.

Axar.az xəbər verir ki, bunu Ukrayna Ali Radasının Xarici siyasət və parlamentlərarası əməkdaşlıq komitəsinin sədri Aleksandr Merejko bildirib.

“O, Ukraynanın məhv edilməsinə aludə olub. Bu, onun üçün siyasi, bəlkə də fiziki sağqalmanın əsas məsələsidir. Putin bunu belə görür, bu onun düşüncə tərzidir.

Müharibəni dayandıra biləcək yeganə amil – Putinə qarşı dəhşətli təzyiqdir. O halda ki, onun başqa çıxış yolu qalmasın. Burada isə çox şey ABŞ-dan asılıdır. Amma əsas məsələ – siyasi iradədir, istəkdir. Təbii ki, bu da Trampın vəd etdiyi şeydir. Sadəcə, ardıcıl olmaq və verdiyi vədləri yerinə yetirmək lazımdır. "Cəbhə xətti boyunca qeyd-şərtsiz atəşkəs. Kim razılaşmırsa, o zaman mən sərt sanksiyalar tətbiq edirəm” – bu təklifə Ukrayna razılaşıb, Rusiya isə bir neçə dəfə razılaşmayıb.

Bəs haradadır o sanksiyalar, Ukraynaya silah haradadır? Əvvəlcə bu sual yaranır. Tramp başlayır deməyə ki, o, Ukraynaya “Tomahavk” raketləri verəcək və ya bəlkə də verəcək. Əgər sən bunu bütün dünyaya açıq şəkildə bəyan edirsənsə, o zaman bunu necəsə yerinə yetirmək lazımdır. Amma sonra deyir: “Raket özümüzə lazımdır”. Bu, ardıcıllıq deyil, bu, ciddi deyil.

Tramp bunu edə bilər, o, sülhü yaxınlaşdıra bilər, sadəcə ardıcıl olmalı və verdiyi vədləri yerinə yetirməlidir”, - Merejko qeyd edib.