Rusiya işğalçıları aviabombalarının uçuş məsafəsini 200 kilometrə qədər artırıblar. Bu, düşmən təyyarələrinin Ukraynanın hava hücumundan müdafiə sisteminin təsir zonasından yayınmasına imkan verəcək.

Axar.az xəbər verir ki, bu barədə Ukrayna Müdafiə Nazirliyinin Kəşfiyyat Baş İdarəsinin məlumatında bildirilib.

Qeyd olunur ki, Rusiya qüvvələri idarəolunan modullu planlaşdırılan bombalardan istifadə etməyə hazırlaşır. Onlar turboreaktiv mühərriklə təchiz olunduqları üçün uçuş məsafələri 200 km-ə çata bilər.

“Oxşar sursatlar, o cümlədən universal planlaşdırma və korreksiya modulları ilə təchiz olunmuş aviabombalar 75 km-ə qədər uçuş məsafəsinə malikdir və düşmən onları əsasən Ukraynanın cəbhəyanı və sərhədyanı ərazilərindəki obyektlərə zərbələr endirmək üçün istifadə edir. Onların 200 km-ə qədər uçuş məsafəsinin artırılması Rusiya təyyarələrinin Ukrayna Müdafiə Qüvvələrinin hava hücumundan müdafiə vasitələrinin təsir zonasına daxil olmadan zərbə endirməsinə imkan verəcək”, – deyə idarənin bəyanatında qeyd olunub.

Bildirilib ki, bu cür sursatlardan rusların Ukraynanın daxili ərazilərində yerləşən obyektlərə hücum üçün də istifadə etməsi istisna edilmir.