Ukraynanın Fransa və İsveç qırıcıları əsasında güclü hava qüvvələri yaratmaq planı ciddi problemlərlə üzləşə bilər.

Axar.az xəbər verir ki, bu barədə “Politiko” nəşrindəki hesabatda bildirilib.

Nəşr bildirir ki, Ukrayna Hərbi Hava Qüvvələri hazırda MiQ-29, Su-25 və Su-27 kimi sovet dövründən qalma köhnə təyyarələrə arxalanır. Bununla belə, ABŞ-ın F-16-ları və məhdud sayda Fransız “Miraj 2000” qırıcıları da daxil olmaqla, Qərb təyyarələrindən də istifadə olunur.

“Qərb ölkələri pilot və mexanik hazırlığı ilə bağlı problemlərə görə qarışıq qırıcı donanma yaratmaqdan çəkinir. Bundan əlavə, ehtiyat hissələri bütün təyyarələrə uyğun gəlmir və tədarük zəncirlərinin və mexanik təlim kurslarının sayı artırılmalıdır”, - Parisdə yerləşən İFRİ təhlükəsizlik tədqiqat mərkəzinin direktoru Elie Tenenbaum vurğulayıb.

Tenenbaum deyib ki, əsas problem “Rafale” tərəfdaşlığının uzun vaxt aparacağı və döyüş meydanında fövqəladə vəziyyətlərə cavab verə bilməyəcəyidir.

Qeyd edək ki, noyabrın 17-də Ukrayna Prezidenti Vladimir Zelenski və fransalı həmkarı Emmanuel Makron 10 il ərzində 100-ə qədər “Rafale” qırıcı təyyarəsinin tədarükünə dair müqavilə imzalayıblar. Həmçinin bir neçə həftə əvvəl Kiyev İsveçlə 100-dən 150-dək “Qripen E” döyüş təyyarəsinin alınmasını nəzərdə tutan əməkdaşlıq müqaviləsi imzalayıb.