ABŞ Hindistanın Rusiya neftinin idxalını əvəz edə bilməsi üçün onlara Venesuela neftinin satışını yenidən bərpa etməyi planlaşdırır.

Axar.az xəbər verir ki, bu barədə “Röyters” mənbələrə istinadən yazıb.

Qeyd olunur ki, Hindistan ABŞ-ın buna görə tarifləri artırmasından sonra Rusiya xam neftinin alışını azaltmağa söz verib. Hindistan həmçinin yaxın aylarda Rusiya neftinin idxalını gündə bir neçə yüz min barrel azaltmağı planlaşdırır:

“ABŞ-ın Venesuela neftini Hindistana tədarük etməyə çalışması Vaşinqtonun Rusiyanın neft satışından əldə etdiyi gəlirləri azaltmaq istəyinin fonunda baş verir.

Hələlik məlum deyil ki, Venesuela nefti “Vitol” və ya “Trafigura” kimi xarici ticarət şirkətləri vasitəsilə satılacaq, yoxsa bunu birbaşa Venesuelanın dövlət neft şirkəti PDVSA həyata keçirəcək”.

Bildirilir ki, yanvar ayında Hindistan gündə təxminən 1,2 milyon barrel alırdı. Proqnozlara əsasən, alışlar fevralda təxminən gündə 1 milyon barrelə, martda isə 800 min barrelə qədər azalacaq.