Yaxın Şərqdə vəziyyətin kəskinləşməsi Avropa və Ukraynanın enerji bazarları üçün yeni risklər yarada və növbəti istilik mövsümünə hazırlığı çətinləşdirə bilər.

Axar.az xəbər verir ki, bunu ukraynalı iqtisadçı və maliyyə analitiki Aleksey Kuş bildirib.

“Bazarın daha da destabilizasiyası halında Avropa resurs çatışmazlığı, mayeləşdirilmiş qaz tədarükündə fasilələr və yeraltı qaz anbarlarının doldurulmasında çətinliklərlə üzləşə bilər. Bu halda növbəti qış region üçün daha gərgin keçə bilər.

Ukrayna üçün isə, qismən qaz idxalından asılı olan ölkə kimi, bu, artıq indidən əlavə resurs mənbələri axtarmaq zərurəti yaradır”, - o qeyd edib.

Aleksey Kuş mümkün variantlar kimi Avropadan idxalı, daxili hasilatın artırılmasını və artıq istismara hazır yataqların işə salınmasını göstərir. Onun qiymətləndirməsinə görə, idxal ən bahalı və ən az proqnozlaşdırılan variant olaraq qalır, xüsusilə də AB daxilində mümkün defisit şəraitində. Hasilatın artırılması da məhdudiyyətlərə malikdir – bu, uzunmüddətli və baha başa gələn prosesdir.

Analitikin hesablamalarına görə, 2025-ci ildə Ukraynada qaz istehlakı 19–20 milyard kubmetr səviyyəsində olduğu halda, hasilat 16,9 milyard kubmetrə qədər azalıb, idxal isə bir neçə dəfə artaraq 6,5 milyard kubmetrə çatıb.