Rusiya Qırmızı Xaç Cəmiyyəti ilhaq edilmiş Krım və Sevastopolda bazar ertəsi günü humanitar yardım paylamağa başlayacaq.

Axar.az xəbər verir ki, bu barədə “Nexta Live” məlumat yayıb.

Bildirilib ki, sakinlər üçün ərzaq və gigiyena dəstləri, içməli su, eləcə də əlil arabaları, gəzinti çarxları, əsalar və qoltuqağacları hazırlanıb.

Yarımadanın şimalında sakinlər doqquz gündən çoxdur ki, elektriksiz qaldıqlarını bildirirlər. İnsanlar su, qaz və rabitədəki fasilələrdən şikayətlənirlər.

Sosial mediada onlar hakimiyyət orqanlarından təxliyə əmri vermələrini, yanacaq və qaz balonlarının çatdırılmasını təşkil etmələrini istəyiblər, həmçinin talan halları barədə məlumat yayıblar.

Turizm mövsümü pozulub. Moskva sənayeni dəstəkləmək üçün 4,3 milyard rubl ayırsa da, heç kim ziyarətə tələsmir və pul, çox güman ki, yerli əməkdaşların cibinə gedəcək.

Bundan əlavə, banklarda nağd pul çıxarmaq imkanları məhduddur və yanacaq qiymətləri sürətlə artır.

Yerli sakinlərin sözlərinə görə, bəzi hallarda benzinin bir litri 4,3 avroya çatır ki, bu da orta Avropa qiymətindən ikiqat çoxdur.