Türkiyədə “Ahbap” dərnəyi ilə bağlı istintaq çərçivəsində saxlanılan Babala TV-nin təsisçisi Oğuzxan Uğur həbs edilib.

Axar.az xəbər verir ki, bu barədə Türkiyə mətbuatı məlumat yayıb.

O, “xidməti vəzifəsindən sui-istifadə” və “cinayət yolu ilə əldə edilən aktivlərin yuyulması”nda ittiham olunur.

“2023-cü il zəlzələsi dövründə xaricdən ianə etmək istəyənləri xüsusilə AFAD-a yönləndirdik. Göndərilən pulun qanunsuz ola biləcəyi ehtimalından xəbərdar idik. Öz şirkətlərimiz və ya şəxsi hesablarımız vasitəsilə heç bir ianə toplamadıq. Bunun qanunsuz olduğunu bilirdik.

Zəlzələdən dərhal sonra Hataya getsəm də, Haluk Levent ilə yaxından işləməmişəm. Buna görə də dərnək üçün edilən ianələrin nəzərdə tutulan məqsəddən başqa məqsədlər üçün istifadə edilib-edilmədiyinə dair heç bir şübhəm yox idi.

Sonradan jurnalist dostum Cansu Şimşək mənə zəng etdi. O, Haluk Leventlə bağlı müxtəlif şübhələrinin olduğunu, prosesdən narahat olduğunu və məsələni araşdırmaq üçün sənədlər axtardığını dedi. O dövrdə Haluk Levent, açıq şəkildə, köməksevər bir insan və bir növ “qəhrəman” kimi qəbul edilirdi. Heç bir sənəd olmadan məsələni araşdırmaq mümkün deyildi. Ona Haluk Leventlə bir müddətdir danışmadığımı dedim və açığı, gözləməyə başladıq. Mənim üçün əsas qırılma nöqtəsi jurnalist dostumdan eşitdiyim şeylərlə bağlı idi. Haluk Levent haqqında müxtəlif şayiələr eşidirdim. Lakin özüm də oxşar vəziyyətlə qarşılaşanda onunla əlaqəni kəsdim”, - Uğur ifadəsində bildirib.

Qeyd edək ki, məşhur müğənni Haluk Levent də 16 iyulda rəhbəri olduğu “Ahbap” dərnəyi ilə bağlı istintaq çərçivəsində həbs olunub.