ABŞ Prezidenti Donald Tramp İranın sui-qəsd təhdidindən sonra Ankarada keçirilən NATO sammitindən gizli yolla ayrılıb.

Axar.az xəbər verir ki, bu barədə “Vaşinqton Post” məlumat yayıb.

“Tramp Türkiyəyə Qətərin hədiyyə etdiyi yeni “Boinq 747-8” təyyarəsi ilə gəlmişdi. Bu, həmin təyyarənin ABŞ prezidentinin beynəlxalq səfərində ilk istifadəsi idi.

Lakin geri dönüş zamanı Tramp əvvəlcə kameralar qarşısında köhnə “Air Force One” təyyarəsinə minib. O, bu təyyarədə uçmaq istədiyini və bunu köhnə günlərin xatirinə etdiyini bildirib.

Ancaq Tramp və bir neçə köməkçisi təyyarəyə mindikdən cəmi bir neçə dəqiqə sonra media nümayəndələrindən gizlicə digər təyyarəyə keçirilib. Məlumata görə, onlar hava limanında istifadə olunan iaşə yük maşınının köməyi ilə təyyarənin media nümayəndələrinin görmədiyi digər tərəfindəki qapıya çatdırılıb və oradan daha kiçik C-32A tipli təyyarəyə - modifikasiya edilmiş “Boinq 757”yə keçirilib.

Məlumata görə, təyyarədə olan jurnalistlər və bəzi Ağ Ev əməkdaşları Trampın artıq həmin təyyarədə olmadığından xəbərsiz olublar.

Hər iki təyyarə Böyük Britaniyadakı “RAF Mildenhall” aviabazasına bir-birindən cəmi bir neçə dəqiqə fərqlə enib”, - məlumatda qeyd olunub.