Suriya ordusu Hələbdə irəliləməkdə davam edir.

Axar.az xəbər verir ki, 15 noyabrdan şəhəri mühasirədə saxlayan hökumət qüvvələri Rusiyanın dəstəyi ilə Karm əl Cəbəl və Əl Şaar bölgələrini müxaliflərdən təmizləyib.

“Röyter”ə danışan müxalif döyüşçülər daha iki bölgəni boşaltmağa hazırlaşdıqlarını deyiblər.

Suriya ordusu dünən verdiyi açıqlamada şəhərdə döyüşən müxaliflərin Hələbi tərk etməyəcəyi halda öldürüləcəyini bildirib.

Bu arada “Assoşieyted Press” agentliyi Hələbdə rejim qüvvələrinə böyük dəstək verən İran, Livan və İraqdan gələn xeyli muzdlu döyüşçünün olduğunu yazıb.

Qeyd edək ki, son iki həftədə baş verən qarşıdurmalarda 300-dən çox dinc sakin həlak olub. BMT şəhəri tərk edən mülki əhalinin sayının 31 minə çatdığını açıqlayıb.

Hələbin cənub-qərbində yerləşən İdlibdə də qarşıdurmalar davam edir. Təkcə dünən baş verən şidətli döyüşlərdə 78 nəfər həlak olub.