Türkiyə Baş naziri Ərdoğanın uzun müddətdir İsrail ilə yaşanan gərginlikdən sonra Təl-Əvivə səfər edəcəyi barədə xəbərlər yayılıb.

"Axar.az" xəbər verir ki, bu gün İsrail Baş naziri Binyamin Netanyahunun nümayəndəsi David Maidanın Ankarada MİT nümayəndəsi Fidan və hökumət səlahiyyətliləriylə gizli görüşlər apardığı barədə iddialar ortaya atılıb. Görüş zamanı Ərdoğanın İsrailə reallaşdırılacaq səfəri müzakirə edilib və ziyarətin aprel ayının ortalarında həyata keçirilməsi planlaşdırılır.

Doqquz türkün həyatını itirdiyi "Mavi Mərmərə" olayından uzun müddət sonra Türkiyə ilə İsrail arasında aparılan təzminat məsələlərində ilkin razılıq əldə edildiyi vurğulanır.

Əldə edilən məlumata görə, İsrail 21 milyon dollar təzminat ödəyəcək və Təl-Əvivlə beynəlxalq müqavilə imzalanacaq. Müqavilə nəticəsində Qəzzaya embarqonun qaldırılması da gündəmdədir. Türkiyəyə Qəzzaya humanitar yardım göndərmək zəmanəti də veriləcək. Ancaq bu Baş nazir Rəcəb Tayyib Ərdoğanın istədiyi kimi embarqonun tamamilə aradan qaldırılması demək deyil. Müqavilənin imzalanmasından sonra Türkiyə Təl-Əvivə səfir göndərəcək və məsələlər səfir tərəfindən koordinasiya ediləcək.