Misirdə ikigünlük apostol səfərində olan Roma Papası Fransisk Yaxın Şərq regionunun problemlərinin həllində, habelə təcavüzə və terrorçuluğa qarşı mübarizədə ölkənin səylərini dəyərləndirib.

Axar.az xəbər verir ki, bu barədə Misir Prezidenti Əbdülfəttah Əs-Sisi administrasiyasının Qahirədə Misir lideri və Roma Katolik Kilsəsinin başçısı arasında görüşün yekunlarına dair yaydığı bəyanatda bildirilir.

Sənəddə deyilir: “Roma Papası Fransisk Misirin Yaxın Şərqdə mühüm rolunu vurğulayıb, onun regionun böyük insan iztirablarına səbəb olan problemlərinin həllində səylərini qiymətləndirib, təcavüz və terrorçuluğun qarşısının alınmasında, inkişafa, firavanlığa və sülhə nail olunmasında Misirin səylərini dəstəklədiyini təsdiqləyib”.

Öz növbəsində Misir Prezidenti Roma Papası Fransiski əmin edib ki, xristian icması Misir cəmiyyətinin ayrılmaz hissəsidir və Misir dinindən asılı olmayaraq bütün vətəndaşlarına eyni gözlə baxır.