İyunun 3-nə Suriyada keçiriləcək prezident seçkilərinə ölkədən kənarda olan suriyalıların səsverməsi başlayıb.

Axar.az xəbər verir ki, seçkilərə hazırkı prezident Bəşər Əsəd də daxil olmaqla, 3 nəfər namizəd qatılıb. Mart ayında parlamentdə qəbul edilən qanuna görə, artıq Suriyada prezident seçkilərində 1-dən artıq namizəd iştirak edə bilər.

Ölkədən kənarda Suriyanın 43 səfirliyində keçirilən səsvermənin nəticələri artıq XİN-ə təhvil verilib. Seçkidə səs verənlərin sayı və kimlərə səs verdiyi açıqlanmasa da, seçici siyahısında olan və ölkədən kənarda müvəqqəti yaşayan Suriya vətəndaşlarının 95 faizinin səsvermədə iştirak etdiyi bildirilir.

Suriya Xarici İşlər nazirinin müavini Feysal Mikdad bildirib ki, suriyalıların seçkidə iştirakı Qərbin bu sahədə təbliğatını puça çıxarıb, suriyalılar gələcəyinə inanırlar və öz talelərinə də səs veriblər. Xatırladaq ki, Qərb Suriyada seçkiləri tənqid etmiş və milyonlarla seçicinin seçkilərdə iştirak imkanlarının olmadığını bildirmişdi.

Suriyada Bəşər Əsədə qarşı silahlı müxalifət 2011-ci ildən mübarizə aparır. İndiyə qədər silahlı toqquşmalarda 140 mindən çox insan ölüb, şəhərlər yerlə-yeksan olub, ölkə iqtisadiyatı iflic hala düşüb, ölkədən yüzminlərlə insan qaçqın düşüb.