İranın keçmiş prezidenti Məhəmməd Xatəmi İran-İraq müharibəsinin bir qrup iştirakçısı ilə görüşərək, dini lider Əli Xameneidən 6 ildən çoxdur ev dustaqlığında saxlanılan Mirhüseyn Musəvi, xanımı Zəhra Rəhnəvərd və Mehdi Kərrubinin azadlığa buraxılmasını xahiş edib.

Axar.az xəbər verir ki, Xatəmi “Musəvi və Kərrubinin həbs məsələsini yalnız İranın dini lideri Əli Xamenei həll edə bilər. Mənim ölkə liderindən indiyə qədər heç bir istəyim olmayıb. Lakin bu gün, burada əyləşən İran-İraq müharibəsi iştirakçılarının adından ölkə liderinə müraciət edərək, ondan Musəvi və Kərrubinin həbsinə son qoyulmasına göstəriş verməsini xahiş edirəm”, - deyib.

Xatırladaq ki, 80 yaşlı Mehdi Kərrubi 2009-cu ildə ölkədə keçirilən prezident seçkilərinin rəsmi nəticələrinə qarşı kütləvi etirazlardan sonra hərəkatın əsas lideri kimi tanınan Mirhüseyn Musəvi və xanımı Zəhra Rəhnəvərdlə eyni vaxtlarda tutulub. O, barəsində hər hansı bir məhkəmə qərarı olmadan 6 ildən çoxdur ETTELAAT-ın birbaşa nəzarətində olan ev dustaqlığında saxlanılır.