İran milli Təhlükəsizlik Şurasının katibi Əli Şahmani İraqda baş verənlərlə bağlı jurnalistlərin suallarını cavablandırıb.

Axar.az Fars xəbər agentliyinə istinadən xəbər verir ki, Şahmani İŞİD-in İraqda bügünki fəaliyyətinin əsl səbəbkarının ABŞ olduğunu deyib.

"ABŞ Açıq Ordular siyasətini siyasətini yeritməklə İŞİD kimi terror qruplaşmalarının ortaya çıxmasına zəmin yaratdı. Bu siyasətin həyata keçirilməsində ABŞ-ın müttəfiqləri maddi, kəşfiyyat kimi yardımlar etdilər. Qorxu, panika və sabitsizlik yaratmaq və azad seçkilər örtüyü altında öz taleyini seçmək istəyən xalqa qarşı silahlı əməliyyatlar həyata keçirmək ABŞ-ın Açıq Ordular siyasətinin əsas hədəfləri sırasında yer alır", - deyə Şahmani bildirib.

İranın İŞİD-lə mübarizədə ABŞ-la əməkdaşlıq məsələsinə də toxunan Şahmani, "Bu məsələ psixoloji müharibə çərçivəsindədir və tamamilə xəyaldır" deyib.

Qeyd edək ki, dünən İran İslam Şurası Məclisinin Milli Təhlükəsizlik və Xarici Siyasət komissiyasının sədri Əlaəddin Brucerdi də Amerika rəsmilərinin daima terrorçu qrupları, o cümlədən "İraq Şam İslam Dövləti" (İŞİD) terrorçu qrupunu dəstəkləməsilə bağlı açıqlama vermişdi.