Ana səhifə Planet |
ABŞ Ədliyyə Nazirliyinin xüsusi prokuroru Robert Müller ABŞ Prezidenti Donald Trampın keçmiş milli təhlükəsizlik müşaviri Maykl Flinnin iştirakı ilə Fətullah Gülənin Türkiyəyə göndərilməsi ilə bağlı plan qurulması iddialarını araşdırır.
Axar.az xəbər verir ki, bu barədə “Vol Strit Jurnal” informasiya yayıb. İddialar ötən il ABŞ-da keçirilən prezident seçkilərinə Rusiya müdaxiləsi ilə bağlı Müllerin apardığı istintaq çərçivəsində ortaya çıxıb. Maykl Flinn Rusiyanın ABŞ-dakı keçmiş səfiri və bir türk iş adamı ilə görüşü barədə məlumatları Ədliyyə Nazirliyinə gec bildirdiyi üçün istintaqa daxil edilib.
Məlumata görə, Maykl Flinn və oğlunun daxil olduğu planda ABŞ-da yaşayan Fətullah Gülənin zorla Türkiyə hökumətinə təhvil verilməsi və bunun qarşılığında 15 milyon dollar alınması nəzərdə tutulub. Araşdırmalar çərçivəsində FTB əməkdaşları artıq Maykl Flinn və türk rəsmilərinin Nyu Yorkda keçirilən görüşü barədə bir neçə nəfəri şahid qismində dindirib.
Danışıqlar zamanı hətta Fətullah Gülənin ABŞ-dan xüsusi təyyarə ilə birbaşa PKK terrorçularının lideri Abdullah Öcalanın saxlanıldığı İmralı həbsxanasına gətirilməsi müzakirə olunub.
Qeyd edək ki, Rusiya ilə əlaqəsi olduğuna görə Tramp tərəfindən Milli Təhlükəsizlik müşaviri vəzifəsindən azad edilən Flinnin Türkiyə üçün lobbiçilik etdiyi iddiası da səslənmişdi.
Tarix
2017.11.11 / 10:54
|
Müəllif
Orxan Tağıyev
|