Rusiyanı Federal Təhlükəsizlik Xidməti idarə edir.

Axar.az xəbər verir ki, bunu “Apostrof” saytına müsahibəsində rusiyalı məşhur tarixçi Andrey Zubov deyib.

“Putin FTX-dan qorxur. Ona görə ki, bu qurum sona qədər onun tabeliyində deyil. Bu təşkilat müstəqildir və Putin gözəl anlayır ki, nə zamansa bu qurum onu hakimiyyətdən uzaqlaşdıra bilər. Ona görə də Putin digər diktatorlar kimi başqa qüvvələrə də diqqətini yönəldir. Xüsusən bu işdə mülki administrasiyadan istifadə edir. Buna misal kimi Kadırov və döyüşçülərini göstərmək olar. Putin öz hakimiyyətinə görə FTX-nın güclənməsinə maneə yaradır. Digər tərəfdən, Prezident Administrasiyasında FTX-nın hakimiyyətə gəlməsindən çox qorxurlar. Ona görə ki, FTX hakimiyyətə gələrsə, ilk olaraq mülki administrasiyadakı şəxslər vurulacaq. Administrasiya bunun üçün hər cür müqavimət göstərir, hətta müxalifətlə də əlaqələr qurmağa çalışır. Hazırda Rusiya cəmiyyətində etirazlar getdikcə alovlanır”, – deyə o bildirib.

Zubov Ermənistandakı hadisələrə də toxunub:

“Ermənistandakı hadisələr 2013-2014-cü ildəki Maydanı xatırladır. Əsas hərəkətverici qüvvə İrəvandakı gənclərdir. Onlara Aleksey Navalnıya bənzəyən Nikol Paşinyan rəhbərlik edir. Bu şəxs də xalqın arasından çıxıb və əyalət adamıdır. Məncə, artıq Ermənistanda insanları Serj Sərkisyanın kriminal rejimi bezdirib. Serj Sərkisyan da özünü Putinə oxşadır və əbədi diktator olmaq istəyir. Erməni ictimaiyyəti bilir ki, indi buna yox deməsə, gec olacaq”.