Avropa Birliyinin ardınca ABŞ da Rusiya əleyhinə əlavə sanksiyalar tətbiq edəcək, ancaq məsələnin detalları hələ bu gün bəlli olacaq.

Axar.az xəbər verir ki, "Svoboda" radiosu ABŞ prezidentinin bu barədəki məlumatını yayımlayıb. Obama deyib ki, bu, Rusiyanın Ukraynadakı qanunsuzluğu davam etdirməsinə görədir:

"Biz Rusiyanın Ukraynadakı qanunsuz fəaliyyətinə cavab olaraq ona qarşı yönəlmiş sanksiyalarımızı intensivləşdirəcəyimizi bəyan edərək Avropa Birliyinə qoşuluruq. Rusiyanın maliyyə, enerji və müdafiə sektorlarına qarşı sanksiyalarımızı dərinləşdirəcək və gücləndirəcəyik. Bu tədbirlər Rusiyanın siyasi izolyasını genişləndirəcək və Rusiya üçün iqtisadi qiymətləri artıracaq. Mənim administrasiyam bu yeni sanksiyaların təfərrüatını bu gün yayımlayacaq".

ABŞ prezidenti qeyd edib ki, sanksiyaların genişləndirilməsi Rusiya qoşunları və ağır silahlarının Ukraynaya yerləşdirilməsinə cavabdır:

"Əgər Rusiya üzərinə düşən vəzifələri bütövlüklə yerinə yetirsə, sanksiyalar dayandırılacaq, - deyə Obama bildirib. - Biz atəşkəs elan olunduğu andan etibarən hadisələrin gedişini dəqiqliklə izləyirik, ancaq hələ ki Rusiyanın vəziyyəti stabilləşdirmək səylərini görmürük".