Ukrayna ilə kifayətlənməyən Rusiya Moldova ərazisində də Krım ssenarisini reallaşdıra bilər.

Axar.az Nr2.com.ua saytına istinadən xəbər verir ki, bu sözləri NATO-nun Avropadakı birləşmiş qüvvələrinin komandanı general Filip Bridlav deyib.

Onun sözlərinə görə, Şimali Atlantika Alyansı Rusiyanın hər cür həmlələrinə hazır olmalıdır:

"NATO Rusiyanın Avropada növbəti gizli işğalına hazır olmalıdır. Moskva hər vəchlə buna çalışacaq. Avropa Kremlin gizli işğal taktikasına çoxdan bələddir. Biz bunu cari ilin fevral ayında Krım hadisələrində də gördük. Daha sonra isə Ukraynanın şərq vilayətləri Kreml tərəfindən ayağa qaldırıldı".

Bridlav açıq şəkildə Rusiyanı hədələyib və bildirib ki, əgər Moskva bir daha "hibrid müharibə"lər xəyalına düşərsə, həmçinin Alyansa üzv ölkələri işğal etmək arzusunda olarsa, önündə NATO-nu görəcək. General qurumun dərhal məlum 5-ci maddəsini işə salacağını deyib.