Şənbə günü ABŞ sahillərinə yaxınlaşacağı təxmin edilən dağıdıcı “Florens” qasırğası səbəbindən Cənubi Karolina, Şimali Karolina və Virciniya ştatlarından təxliyyə edilən insanların sayı 1,7 milyona çatıb.

Axar.az xəbər verir ki, hökumət təbii fəlakətin daha 5,4 milyon insanın yaşadığı ərazilərdə də dağıdıcı təsir qüvvəsinə malik olacağını bəyan edib.

Məlumata görə, vətəndaşların artıq ölkənin mərkəzi ştatlarına doğru yol aldığı deyilir.

Evlərini tərk etməyən vətəndaşlar isə ərzaq, yanacaq və kömür tədarükü görməyə başlayıb.

Qeyd edək ki, bundan öncə prezident Donald Tramp da “Florens” qasırğası ilə bağlı əhaliyə xəbərdarlıq etmişdi.