"Dəfələrlə Amerikanın neft şirkətləri Xəzərdə müəyyən layihələrdə pay sahibi olmağa çalışıblar. ABŞ-ın Xəzər regionundan çıxarılması bölgə dövlətlərinin suverenliyini gücləndirəcək və bu regionda qüvvələr balansını dəyişdirəcək".

Axar.az xəbər verir ki, bu sözləri rusiyalı politoloq Stanislav Tarasov deyib. Politoloq Həştərxan sammitində qəbul edilən bəyanatın önəmli olduğunu bildirib:

"Həştərxanda baş tutan Xəzər sammitini adi bir hadisə hesab etmək olmaz. "Xəzər beşliyi" ilk dəfə statusla bağlı siyasi bəyanat qəbul etdi. Bu regional əməkdaşlığın inkişafına əsaslı yardım edəcək. Əlbəttə ki, bu razılığa daha öncələr də gəlmək olardı".

Politoloq bəyanatın mahiyyətinə toxunaraq, ABŞ-ın Xəzərdə mövqe itirdiyini deyib:

"Bəzi ekspertlərin fikrincə isə bölgədə digər bir təhlükə "üçüncü qüvvə"nin ortaya çıxma ehtimalıdır. Dəfələrlə Amerikanın neft şirkətləri Xəzərdə müəyyən layihələrdə pay sahibi olmağa çalışıblar. ABŞ-ın Xəzər regionundan çıxarılması bölgə dövlətlərinin suverenliyini gücləndirəcək və bu regionda qüvvələr balansını dəyişdirəcək".

Qeyd edək ki, sentyabrın 29-da Rusiyanın Həştərxan şəhərində keçirilən Xəzər sammitində Xəzərin statusu ilə bağlı siyasi bəyanat qəbul edilib.