Şimali Koreyanın 32 yaşlı lideri Kim Çonq Un artıq 38 gündür ki, yoxa çıxıb.

Axar.az xəbər verir ki, bədnam bir rejimin diktatoru olan bu şəxsin yoxa çıxması dünya mediasında əsas müzakirə mövzusu olaraq qalmaqdadır.

Koreya Əmək Partiyasının yaranmasının 10 oktyabr ildönümündə və 9 sentyabr - müstəqillik günü kimi iki əsas bayramda liderin gözə dəyməməsi hakimiyyət daxilində ciddi problemlərin olduğunu göstərir.

Rejimin xarici təhlilçiləri bu gənc liderin şəkərli diabetdən əziyyət çəkdiyini və siqaret aludəçiliyini əsas gətirərək. sağlamlığında ciddi problemlər olduğu iddiasını önə sürsə də, bu, həqiqəti əks etdirmir.

Başqa bir versiyaya görə, son aylarda diktatorun tez-tez dünya mediasında gündəmə gəlməsi onun daxili kəşfiyyat orqanları tərəfindən gizlədilməsinə və ictimai çıxışlarının məhdudlaşdırılmasına gətirib çıxarıb. Başqa sözlə desək, həyatı üçün təhlükə yarandığına görə lider gizlədilir.

Son vaxtlarda yayılan məlumatlara görə isə Kim Çonq Un öz yaxın ətrafı tərəfindən devrilib.

Bir müddət öncə İtaliyanın "La Repubblica" qəzetinin hərbi çevriliş nəticəsində Kim Çonq Unun öldürüldüyü və hakimiyyəti qorumaq üçün müvəqqəti olaraq 27 yaşlı bacısı Kim Con Unun vəzifə başına keçdiyi iddiaları getdikcə öz təsdiqini tapmaqdadır.

Analitiklər bu hadisənin gizli saxlanılmasına səbəb kimi devrilmiş diktatorun həqiqi varisinin olmamasını göstərirlər.

Bir müddət öncə Cənubi və Şimali Koreya hökumətləri arasında yüksək səviyyədə danışıqların aparılması barədə razılığa gəlinməsi və yoxa çıxmış liderin bir müddət öncə Cənubi Koreya ilə münasibətlərin yaxşılaşdırılması üçün xalqa müraciət etməsi düşünülmüş oyunun tərkib hissəsi ola bilər. Yəni liderin təcrübəsiz olması və onu devirdikdən sonra yaranan vəziyyətə nəzarət etmək üçün qiyamçıların kompromis variantları gözdən keçirməsi istisna edilmir.

BMT-nin 69-cu sesiyasında çıxışı zamanı Şimali Koreyanın Xarici İşlər naziri Li Su Yonun Cənubi Koreya ilə birləşməyin mümkünlüyünü deməsi ölkədə xaosun qarşısının alınması üçün 2-ci variant olaraq qiymətləndirilir.

Görünən odur ki, 38 gündür müəmmalı lider yoxa çıxıb və dəmir pərdələrlə dünyadan təcrid olunan bu ölkədə nə baş verdiyini heç kəs bilmir.