Pilotsuz uçuş aparatlarının alışı Ukraynadakı böhranın dərinləşməsi amilinə çevrilməməlidir.

Axar.az xəbər verir ki, bu sözləri Rusiya Xarici İşlər Nazirliyinin sözçüsü Mariya Zaxarova Türkiyə və Ukrayna arasında pilotsuz uçuş aparatlarının alğı-satqısı ilə bağlı əldə edilən razılığı şərh edərkən deyib.

“İkitərəfli hərbi-texniki əməkdaşlıq suveren dövlətlərin haqqıdır. Problem ondadır ki, Ukrayna daxili silahlı böhran yaşayır, daha doğrusu, vətəndaş müharibəsi... Bu daxili böhran beynəlxalq miqyasa malikdir. Belə ki, bir sıra ölkələr və beynəlxalq təşkilatlar böhranın həlli üçün yalnız sülh yolunu müdafiə edirlər. Ona görə də silahların Ukraynada yerləşdirilməsi daxili böhranın dərinləşdirilməsində amilə çevrilə bilməz”, - deyə XİN sözçüsü bildirib.

Qeyd edək ki, Ukraynanın “Ukrspeseksport” dövlət şirkəti ilə Türkiyənin “Baykar Makina” şirkəti arasında “Bayraqdar TB2” pilotsuz uçuş aparatlarının alğı-satqısı barədə müqavilə imzalanıb.