NATO təyyarələrinin Avropanı bombalaması beynəlxalq hüququn kobud şəkildə pozulmasıdır.

Axar.az xəbər verir ki, bu sözləri Sputnik-ə açıqlamasında Rusiyanın Avropa Birliyindəki daimi nümayəndəsi Vladimir Çijov deyib. O bildirib ki, bu hadisənin 20-ci ildönümü beynəlxalq hüququn kobud şəkildə pozulduğunu xatırlatmaq üçün yaxşı səbəbdir:

"Bu səbəbdən həmin hadisəni xatırlamaq istəmirlər. Ancaq onu xatırlamaq üçün bir çox səbəb var, 20-ci ildönüm də bunlardan biridir”.

Yuqoslaviyanın 1998-2000-ci illərdə xarici işlər naziri vəzifəsində çalışan Zivadin Yovanoviç də bombardmanın əsas səbəbinin Rusiya sərhədlərinə yaxınlaşmaq olduğunu bildirib:

“O zaman NATO-nun təcavüzünün qarşısını almaq üçün heç bir yol yox idi. Onlar beynəlxalq hüquqa və BMT-yə qarşı güclərini göstərmək və cənub-şərqdə möhkəmlənmək istəyirdilər. Məqsədləri də Balkanlarda hərbi baza qurmaq və Rusiya sərhədlərinə yaxınlaşmaq idi”.

Qeyd edək ki, NATO Serbiyanı 1999-cu ilin 24 martından 10 iyununa qədər bombardman edib. Rəsmi Belqradın hesablamalarına əsasən, bu bombardmanlar zamanı 2500 nəfər həlak olub, 12,5 min nəfər yaralanıb. Ölkəyə ümumilikdə 100 milyard dollara yaxın zərər dəyib.