Özbəkistan prokurorluğu prezident qızının başçılıq etdiyi mütəşəkkil cinayətkar qrup üzvlərinə ayrıca icraat üzrə cinayət işi açıb. Prokurorluq onların barəsində axtarış elan edib.

Axar.az-ın məlumatına görə, prezidentin qızı Gülnarə Kərimovanın silahdaşları barəsində cinayət işi üzrə ibtidai istintaqın bəzi təfərrüatı açıqlanıb.

Mütəşəkkil dəstənin üzvləri 2011-2013-ci illər ərzində sahibkarlığın aparılması adı altında təsərrüfat fəaliyyəti sahəsində sistemli əsasla cinayət törədərək, hədə-qorxu və şantaj yolu ilə, sənədlərin saxtalaşdırılması ilə dövlətə külli miqdarda ziyan vurublar.

İstintaqın məlumatına görə, cinayətkar qrup dövlət aktivlərini ucuz qiymətə alıb. Nəticədə "Uzbekiston Havo" aviaşirkətinin, "Coca-Cola Ichimligi Uzbekiston Ltd" birgə müəssisəsinin və "Fərqanə NEZ"-in aktivləri talan edilərək mənimsənilib. Dəyən ziyan təxminən 200 milyon dollar məbləğində qiymətləndirilib.

Cinayətkar qrupun ümumi koordinasiyası Nurməhəmməd Karaboyev və Rüstəm Маdumarov tərəfindən həyata keçirilib. Madumarov Kərimova ilə vətəndaş nikahındadır. Prezidentin qızı isə ev dustağıdır.