Suriya ordusunun İdlibdə təhlükəsizlik bölgəsi istiqamətinə irəliləyişini davam etdirməsi növbəti dəfə Türkiyə və Rusiya arasında müzakirə edilib.

Axar.az xəbər verir ki, dövlət başçıları Rəcəb Tayyib Ərdoğan və Vladimir Putinin telefon söhbətindən sonra bu çərçivədə Türkiyənin Müdafiə naziri Hulusi Akarla rusiyalı həmkarı Sergey Şoyqu arasında telefon danışığı baş tutub.

Telefon danışığı zamanı Suriyanın İdlib bölgəsində baş verənlər və gərginliyin azaldılması üçün atılacaq addımlar müzakirə edilib.

Qeyd edək ki, Suriya ordusu İdlibdə təhlükəsizlik bölgəsi istiqamətinə irəliləyişini davam etdirir. İdlib razılaşmasına baxmayaraq, Suriya ordusu Rusiyanın dəstəyi ilə mövqeyini daha da genişləndirir.

Türkiyə tərəfi isə sözügedən irəliləyişin regionda itkilərə səbəb olduğunu, bölgə xalqlarının həyat şəraitini çətinləşdirdiyini, həmçinin müşahidə məntəqələrinin təhlükəsizliyi üçün də risk yaratdığını açıqlayıb.