"Qaqik Çarukyanın Sərkisyana qarşı çıxmasının arxasında Robert Köçəryan dayanır".

Axar.az xəbər verir ki, bu iddia ilə Ermənistan "168 Jam" qəzeti çıxış edib.

Mətbuat Çarukyanın bir müddət öncə Köçəryanla görüşdüyünü bildirib:

"Təsadüfi deyil ki, Sərkisyanın çıxışından sonra Köçəryan dərhal Kiyevdən Ermənistana qayıtdı. Lakin ən maraqlı məqam Çarukyanla Köçəryan arasında olan əlaqədir. Köçəryanın yaxın adamları bildirirlər ki, onlar Çarukyanı müdafiə edəcəklər. Üstəlik, bir müddət öncə Çarukyan Moskvaya səfəri zamanı gizli olaraq Köçəryanla görüşmüşdü. Bu illər ərzində Köçəryanın Moskva ilə apardığı danışıqlar artıq öz bəhrəsini verib. Artıq Kreml Köçəryanın komandasına yenidən geriyə dönmək üçün yaşıl işıq yandırıb. Yəqin ki, bu yaxınlarda biz Köçəryanın böyük siyasətə dönməsinin şahidi olacağıq".

Qeyd edək ki, Qaqik Çarukyan Robert Köçəryanın biznes ortağıdır. Qarabağda anadan olan Köçəryan 1996-cı ilə qədər qondarma Dağlıq Qarabağ rejiminin rəhbəri olub. Sonra o, Ermənistana Baş nazir vəzifəsinə gətirilib. Levon Ter-Petrosyanın istefasından sonra Moskva Köçəryanı prezident təyin edib. Bununla da Ermənistanda Qarabağ klanının hakimiyyəti daha da güclənib. 2008-ci ilə qədər prezident olan Köçəryan sonralar öz yerini Qarabağdan olan və onun rəhbərliyi dövründə hökumətdə Müdafiə naziri, Baş nazir işləyən Serj Sərkisyana təhvil verib. 2013-cü ildə Sərkisyanın yenidən prezident seçilməsi Köçəryanla aralarındakı siyasi mübarizəni daha da gücləndirib.

Ekspertlər isə hazırda Ermənistanda yaranmış situasiyanın ölkədə yeni siyasi müharibənin başlanğıcını qoyduğunu söyləyirlər.