Misirin paytaxtı Qahirənin Əl-Əmiriyə məhəlləsində polislə terrorçular arasında şiddətli atışma olub.

Axar.az xəbər verir ki, yaşayış binasından ətrafa və polislərə atəş açan silahlıların müqaviməti axşam saatlarına qədər davam edib. Sakinlərə səsgücləndiricilər vasitəsilə evlərindən çıxmamaq barədə çağırış edilib. Əraziyə cəlb olunmuş xüsusi təyinatlı polis dəstəsi terrorçuları mühasirəyə alıb.

Silahlıların Qahirənin mərkəzində bombalı terror aktı həyata keçirmək istədikləri bildirilir. Mühasirəyə alınansilahlıların gizləndikləri mənzildə partlayıcı qurğuların da olduğu qeyd edilir.

Əl-Əmiriyə rayonu Qahirənin ən sıx məskunlaşmış ərazisi olduğundan, binanın polis tərəfindən mühasirəsi uzun müddət davam edib. Yerli vaxtla saat 19:35-də binaya girən polis əməkdaşları İŞİD-çi olduqları bildirilən terrorçuları məhv ediblər.

Polislə terrorçularla atışma Misir telekanallarında canlı yayımlanıb.