Çiçəklənən Ermənistan Partiyasının lideri Qagik Çarukyan artıq 6 saatdır ki, Milli Təhlükəsizlik Xidmətinin binasında saxlanılır.

Axar.az xəbər verir ki, Çarukyanın tərəfdarları isə polisin çağırışlarına baxmayaraq, ərazidən uzaqlaşmır.

MTX-in binasında hər keçən dəqiqə vəziyyət daha da gərginləşir. Çarukyanın hansı statusla saxlanıldığı məlum deyil. Bəzi erməni media orqanları isə Çarukyanın artıq siyasi qərarla həbs edildiyini yazsa da, hələlik rəsmi informasiya yoxdur.

Qeyd edək ki, Çiçəklənən Ermənistan Partiyasının ofislərində MTX tərəfindən bu gün yoxlamalar başlayıb. Buna cavab olaraq çoxlu sayda insan Ermənistan Milli Təhlükəsizlik Xidmətinin binası qarşısında etiraz aksiyası keçirib.

Aksiyaya polis müdaxiləsi nəticəsində Çiçəklənən Ermənistan Partiyasının deputatları da daxil olmaqla, çoxsaylı etirazçı xəsarət alıb.

Müxalifət bu yoxlamaları Baş nazir Nikol Paşinyanın siyasi partiyalara qarşı növbəti aqressiyası və təzyiqi, eyni zamanda, diktatura qurması kimi dəyərləndirir.