Liviyada Xəlifə Haftarın Tripoliyə hücumuna əsas dəstək verən Rusiya, ABŞ və Fransa idi.

Axar.az xəbər verir ki, bunu BMT-nin Liviya üzrə keçmiş təmsilçisi Qassan Salame deyib.

O bildirib ki, o zaman bütün dünya BMT Baş katibi Antonio Quterreşdən şübhələnirdi:

“Ancaq Haftara əsas dəstək verənlər BMT Təhlükəsizlik Şurasının üzvləri – Rusiya, ABŞ və Fransa olub. Bu ölkələrin liderlərinin vicdanı yoxdur. Bunlar Liviya xalqının gələcəyi ilə oynadılar. Haftarı dəstəkləyən ölkələrin ikiüzlülüyünə görə Liviyada 14 ay qan axdı”.

Q.Salame vurğulayıb ki, İngiltərə BMT Təhlükəsizlik Şurasına “Haftarın hücumlarını qınamaq və atəşkəs əldə etmək üçün” qətnamə layihəsini təqdim edib:

“Rusiya qətnaməyə qarşı çıxdı. Tarixdə çox nadir bir şəkildə ABŞ və Fransa rusları dəstəklədi”.

Xatırladaq ki, 2019-cu il aprelin 4-də Haftar Tripoliyə hücum əmrini verəndə A.Quterreş şəhərdə olub. BMT Baş katibi səfəri yarıda kəsmək əvəzinə bir gün sonra Benqaziyə gedərək Haftarla görüşüb. Bu da dünya ictimaiyyətində “BMT Haftarı dəstəkləyir” fikrini formalaşdırıb.