Ankarada keçiriləcək məşhur “Kültür Yolu” Festivalının açılışı dahi Azərbaycan bəstəkarı Üzeyir Hacıbəylinin xatirəsinə həsr olunacaq.

Bu barədə Kult.az-a Azərbaycanın Türkiyədəki Səfirliyinin nəzdindəki Azərbaycan Mədəniyyət Mərkəzindən məlumat verilib.

Məlumata görə, mərasim Azərbaycan Mədəniyyət Mərkəzi ilə Türkiyə Mədəniyyət və Turizm Nazirliyinin Dövlət Opera və Balet Baş Müdirliyi arasında həyata keçirilən ortaq layihə çərçivəsində baş tutacaq.

“CSO Ada Ankara” Ana Salonunda təqdim olunacaq "İki dövlət - bir səhnə: Qardaş nəğmələr" (İki Devlet – Bir Sahne: Kardeş Ezgiler) adlı möhtəşəm konsert proqramı 19 sentyabr tarixində reallaşdırılacaq.

Ankara Dövlət Opera Orkestri, TRT Birləşmiş Xorunun müşayiəti, Azərbaycan Respublikasının xalq artisti Yalçın Adıgözəlovun dirijorluğu ilə keçiriləcək konsertdə Azərbaycan və Türkiyənin tanınmış opera sənətçiləri iştirak edəcək.

Proqramın repertuarında dahi bəstəkar Üzeyir Hacıbəylinin ölməz əsərləri, Azərbaycan və türk bəstəkarlarının seçilmiş əsərləri yer alacaq.