ABŞ-ın Baltimor şəhərində qaradərili gəncin ölməsindən sonra başlayan etiraz dalğası paytaxt Vaşinqtona və Nyu Yorka da sıçrayıb.

Axar.az xəbər verir ki, Nyu Yorkda aksiya iştirakçıları qaradərili gənclərin polis tərəfindən öldürülməsinə etiraz edərək "Hər yer Ferqusson! Hər yer Baltimor" şüarları səsləndiriblər. Polis 60-dan çox aksiya iştirakçısını saxlayıb.

Paytaxt Vaşinqtonda toplanan minə yaxın insan isə Ağ Evə qədər yürüş edib. Etirazçılar "qaraların həyatı qiymətlidir", "Baltimordan Vaşinqtonadək azad olanana qədər mübarizə aparacağıq" və "Media, qırıq şüşələrin əvəzinə, qırılmış sümüklərin arxasınca düş" şüarları səsləndiriblər.

Bu arada "Amnesti İnternəşnl" təşkilatı mitinqlərdə insan hüquqlarının pozulub-pozulmamasını yoxlamaq üçün Baltimora mütəxəssislər göndərəcək.

Qeyd edək ki, Baltimorda Fredi Qrey adlı qaradərili gənc polis tərəfindən saxlandıqdan bir həftə sonra boynu qırılmış şəkildə xəstəxanaya aparılıb və orada ölüb. Bundan sonra şəhərdə etirazlar başlayıb.