Nikol Paşinyanın başqa çıxış yoxdur, o, mütləq istefaya getməyə məcburdur.

Axar.az Report-a istinadla xəbər verir ki, bu barədə ölkənin Milli Təhlükəsizlik Xidmətinin (MTX) keçmiş direktoru, Vətən Partiyasının sədri Artur Vanetsyan deyib.

Onun sözlərinə görə, əgər Nikol Paşinyan 8 dekabr saat 12:00-yə qədər istefaya getməsə, xalq öz tələbini itaətsizlik aksiyaları ilə təqdim edəcək.

"Paşinyanı mümkün qədər tez kənarlaşdırmaq üçün qanunla nəzərdə tutulmuş bütün addımların atılmasına təşəbbüs göstərəcəyik", - Vanetsyan bildirib.

İtaətsizlik olacağı təqdirdə hüquq-mühafizə orqanlarının həbsləri həyata keçirməyə başlayacağı ilə bağlı təhlükənin olub-olmayacağı barədə suala cavabında Artur Vanetsyan bildirib ki, Ermənistan Respublikasında yalnız hüquq-mühafizə sistemi deyil, həm də dövlət strukturları daha Nikol Paşinyana tabe olmur.

"Polis öz işini yerinə yetirir, Nikol Paşinyanın yox, bizim hamımızın təhlükəsizliyini təmin edir", - deyə o əlavə edib.