11:33

MHP başqanı Dövlət Baxçalı partiya qərargahında verdiyi açıqlamasında koalisiyaya qoşulmayacaqlarını bildirib.

Axar.az xəbər verir ki, partiya sədri ana müxalifət partiyası vəzifəsini boynuna götürməyə hazır olduqlarını bildirib:

"Zənnimcə, Türkiyədə konstitusiya etibarlıdır. Seçkilərdə əgər tək başına bir siyasi partiya iqtidar olmursa, ölkəni iqtidarsız buraxmamaq üçün keçmişdə qazanılan təcrübələrdən istifadə olunur. Davudoğlunun Məclisdəki partiyalarla necə bir hökumət meydana gətirəcəyinə dair işlərə başlaması lazımdır. Bu işlər başlamadan, siyasi partiyalarla heç bir görüş keçirilmədən danışmaq çətindir. AKP Oslo görüşündən bəri həll prosesini davam etdirib. Bu həll prosesinin bir qanadı hazırda 10 faizlik səddi aşan 79 millət vəkiliylə TBMM-dədir. Demək, birinci koalisiya AKP ilə HDP arasında olmalıdır. AKP və HDP arasındakı örtülü əməkdaşlığı kamuflyaj etmək, gizlətmək isə siyasi əxlaqsızlıqdır".

Baxçalı ikinci variant kimi AKP, CHP və HDP-nin bir koalisiya qurmaq şansını belə izah edib:

"Bunları bu an qeyri-rəsmi rəqəmlərlə ifadə etsək, AKP-HDP koalisiyası 258+79 yerlə bir koalisiya modeli olaraq ortaya qoya bilər. İkinci model isə AKP, CHP, HDP, yəni 258+132+79=469 yerlə başqa bir koalisiyadır. Bununla da 78,9 faizlə geniş bir koalisiya qurulur. Belə bir koalisiyanın içində MHP ana müxalifət vəzifəsini boynuna götürməyə də hazırdır. Ədalət və İnkişaf Partiyası təxminən 13 ildir davam edən təkbaşına iqtidarını itirib. AKP üçün sonun başlanğıcı görünür".