Rusiya Suriyaya ordu yeritməklə Qərblə danışıqların yeni mərhələsinə start verib.

Axar.az xəbər verir ki, bu sözlər ABŞ-ın beyin mərkəzlərindən olan "Stratfor" təşkilatının hesabatında yer alıb. Moskvanın bu dərəcədə aktivləşməsinin arxasında həmçinin Rusiyanın Yaxın Şərqdə güclənməsi planları da yatır:

"Rus ordusunun Suriyaya girməsindən sonra Moskva ilə Vaşinqton arasında danışıqlar əvvəlki illərə nisbətən artıb. Rusiya həmçinin Suriyadakı əməliyyatlarının İŞİD və Suriya dövlətinin ərazisi ilə məhdudlaşacağını heç vaxt bəyan etməyib. Moskva həmçinin çalışır ki, Əsədin mövqelərini möhkəmləndirib onun digər opponentlərini danışıqlar masası arxasında oturmağa məcbur etsin. Digər tərəfdən isə Rusiyanın addımlarının arxasında gizli məqsəd var. İranla nüvə müqaviləsi imzalandıqdan sonra Rusiyanın Yaxın Şərqdə mövqeləri zəifləyib. Ona görə də ələvilərin tərəfini tutmaqla Rusiya Suriyanın şiə bölgəsilə əlaqələrini saxlamağa çalışır. Bu isə öz növbəsində İranla Rusiyanın Suriya məsələsində sıx əməkdaşlığına təkan verəcək. Rusiya artıq Yaxın Şərqdə hədəflərinin çoxuna doğru yol əldə edib. Onun Suriyaya hərbi intervensiyası Bəşər Əsədin mövqelərini gücləndirəcək. Bu isə Kremlə nəinki Yaxın Şərq, hətta Ukraynada da Qərbə təzyiq üçün mühüm rıçaq vermiş olacaq".