Avropa Komissiyası qaçqınların Avropa İttifaqı ölkələrinə qəbulu kvotalarını məcburi qaydada artırsa, qurumun Ali Məhkəməsinə şikayət edəcəyik.

Axar.az-ın məlumatına görə, bu açıqlama ilə Çexiya Prezidenti Miloş Zeman çıxış edib.

Ölkə başçısının sözlərinə görə, Slovakiya kimi Çexiya da bu qərara qarşı məhkəmə iddiası qaldıracaq.

Çexiya parlamentinin Aşağı Palatasının deputatları qabaqcadan qaçqınların Aİ ölkələri üzrə bölünməsinə qarşı çıxıblar.

Deputatlar xarici sərhədlərin mühafizəsi və qaçqın statusu almaq hüququ olmayan şəxslərin qaytarılması tədbirlərini dəstəkləyiblər.

Qeyd edək ki, Suriyadan minlərlə qaçqın Avropa İttifaqı üzvü olan ölkələrə axın edir. Bəzi dövlətlər isə miqrant axınına etiraz edərək sərhədlərini onların üzünə bağlayır.