Respublikaçılar Rusiya Prezidenti Vladimir Putinlə mübarizə apara bilməz.

Axar.az xəbər verir ki, bu sözləri Nyu Yorkda təşkil edilən yığıncaqda ABŞ Prezidenti Barak Obama deyib.

Obama onu tənqid edən Respublikaçılar Partiyasına sərt cavab verib:

"Respublikaçı namizədlərin hamısı "Obama Putinin qarşısında zəifdir. Amma mən Putinlə danışsam, rus lider dərhal öz yerini biləcək", - deyirlər. Lakin sonra görürük ki, CNBC kanalının moderatorlarının öhdəsindən gələ bilmirlər. Əgər hələ bu adamları idarə edə bilmirsinizsə, Çin və Rusiya liderlərinin sizi ciddi şəxs kimi qəbul edəcəklərini düşünmürəm".

Qeyd edək ki, Respublikaçılar Partiyası CNBC kanalı ilə əməkdaşlığı dayandırıb. Buna səbəb isə kanalın moderatorlarının Respublikaçılardan prezidentliyə namizəd olan şəxslərə istehzalı və kinayəli suallar verməsi göstərilib.

ABŞ-da prezident seçkisi 2016-cı ilin noyabrında keçiriləcək.