Əfqanıstan və İraqda törədilən bütün qətllərin günahkarı həmin dövrdə vitse-prezident olan Dik Çeyni və Müdafiə naziri Donald Ramsfelddir.

Axar.az xəbər verir ki, bu barədə 1988-1992-ci illərdə ABŞ prezidenti olmuş Corc Buş deyib.

O, Əfqanıstan və İraq müharibələrinin səbəbkarı hesab olunan oğlu Corc Buşu (2000-2008) müdafiə edib:

"Çeyni və Ramsfeld ABŞ-ın digər ölkələrdə hərbi əməliyyatları məsələsində olduqca həyasız davrandılar. Əfqanıstan və İraqda törədilən bütün qətllərin günahkarı həmin dövrdə vitse-prezident olan Dik Çeyni və Müdafiə naziri Donald Ramsfelddir. Çeyninin 11 Sentyabrdan sonra Yaxın Şərqdə verdiyi reaksiya çox sərt idi. Onun bu hərəkəti xoşuma gəlmədi. Məncə, onun bu münasibəti prezidenti də incitdi".

Oğul Buş atasının bu sözlərinə "Nyu York Tayms" qəzetində münasibət bildirib:

"Prezidentliyim dövründə qərarları özüm verirdim. Dik Çeyni və Donald Ramsfeldlə birlikdə çalışmaqdan qürur duyurdum".