Odessa vilayətinin qubernatoru Mixail Saakaşvilinin populyarlığı artır və o, Ukraynanın siyasi arenasında önəmli oyunçuya çevrilir.

Axar.az xəbər verir ki, bu barədə İngiltərənin "Faynənşl Tayms" qəzeti yazıb.

Qəzet Saakaşvilinin rəqiblərini təxribata çəkmək üçün onları korrupsiyada ittiham etdiyini bildirib:

"Buldozer" Saakaşvili yerli avtoritetlərlə hesablaşmır və onlara qarşı çıxır. Saakaşvili hazırda ölkənin ən məşhur siyasətçilərindən biridir. Son araşdırmaya görə, Ukraynada Saakaşvilinin reytinqi 40, Prezident Poroşenkonun isə 20 faizdir".

Qəzet yazıb ki, Ukraynada bir çox seçici Saakaşvilinin özünə olan inamı sayəsində yerli oliqarxlara qarşı mübarizəyə başlaya biləcəyini düşünür.

"O, qətiyyətli, qərarlı, məqsədyönlüdür və hökumətdəki bir çoxları bunu xoşlamır", - ictimai fəal Andrey Çernikov qəzetə açıqlamasında deyib.

Qəzet daha sonra bildirib ki, lakin bir çoxları Saakaşvilinin bu xarakterinin Ukraynada önəmli post tutmasına maneə olduğunu düşünür:

"Bəzi ukraynalı məmurlara görə, Saakaşvili ölkənin baş naziri ola bilər. Lakin onlara görə, Saakaşvilinin bu postu tutması Rusiya Prezidenti Vladimir Putin tərəfindən sərt reaksiya ilə qarşılana bilər".