Türkiyədə səfərdə olan ABŞ-ın vitse-prezidenti Co Baydenin "PKK ilə PYD eyni deyil" açıqlaması Baş nazir Əhməd Davudoğlunu qəzəbləndirib.

Avropa.info xəbər verir ki, Davudoğlu Baydeni PKK terroru nəticəsində həyatını itirənlərin yaxınları ilə görüşmədiyi üçün qınayıb.

"PKK ilə YPG/PYD-nin ayrı olduğunu iddia etmək, Qəndildən Suriyaya gedən qrupları, silahları, Suriya vasitəsi ilə Türkiyəyə gətirilməyə çalışılan silahlar haqqında məlumatı olmamaq, əslində, görməmək deməkdir. YPG/PYD-nin fəaliyyətinin mənbəyi Qəndildir, terrorçular oradan göndərilir. Vaşinqtondan belə görünə bilər, amma Türkiyədə elə görünmür. YPG/PYD Əsəd rejimi ilə əməkdaşlıq edir, İŞİD-lə döyüşməsi onu qanuniləşdirə bilməz. Türkiyə Qəndilə etdiyi kimi, YPG/PYD-yə də müdaxilə edə bilər.

Cənab Baydenin görüş proqramını kim yazıb bilmirəm, amma Türkiyədə baş verənləri tam olaraq görməsini istəmədiyi bəllidir. Türkiyə azad bir ölkədir, əlbəttə, hamı hamı ilə görüşə bilər. Amma cənab Bayden madam ki, Türkiyədə baş verənlərlə tanış olmaq istəyir, PKK terrorunun şəhid etdiyi şəxslərin yaxınları, mülki vətəndaşlarımla da görüşərdi. Ya da PKK terrorunun əlil etdiyi vətəndaşlarımızla da görüşərdi", - deyə Davudoğlu bildirib.

Qeyd edək ki, Davudoğlu bu açıqlamanı Baydenlə görüşdən öncə səsləndirib.