İran və Çinin müdafiə nazirləri iki ölkə arasında hərbi və müdafiə sahəsində əməkdaşlığın intensivləşdirilməsini müzakirə etmək üçün görüş keçiriblər.

Axar.az xəbər verir ki, bu barədə “Mehr” məlumat yayıb.

İranın müdafiə naziri Məhəmməd Rza Aştianinin çinli həmkarı Donq Jun ilə görüşü Qazaxıstanda, ŞƏT ölkələrinin müdafiə nazirlərinin sammiti çərçivəsində baş tutub.

Çinin son regional hadisələrlə bağlı mövqeyini, xüsusilə də aprelin 1-də İranın Dəməşqdəki konsulluğuna İsrailin hücumunu pisləməsini təqdir edən Aştiani vurğulayıb ki, son regional gərginlik və Qəzzada yaşanan acınacaqlı vəziyyət ABŞ-ın regionda sabitliyi pozan hərəkətlərinin nəticəsidir.

Çinin müdafiə naziri də öz növbəsində İsrailin İranın Dəməşqdəki səfirliyinin konsulluq binasına hücumunun beynəlxalq qanunları pozduğunu vurğulayıb və İsrailin hücumuna cavab verməyin İranın qanuni haqqı olduğunu bildirib.