16:21

Avropa Birliyi (AB) Ukraynaya humanitar yardım və Moldovada ukraynalı qaçqınlar üçün həyata keçirilən layihələrə 148 milyon avro ayırıb.

Axar.az xəbər verir ki, bu barədə Avropa Komissiyası məlumat yayıb.

“Müharibə Ukraynanı viran etməkdə davam etdiyindən, təxminən 12,7 milyon insanın təcili yardıma ehtiyacı var”, - məlumatda bildirilib.

Qeyd olunub ki, bununla da Avropa Birliyinin humanitar yardımı 1,1 milyard avroya çatıb.

Xüsusən, Ukraynada humanitar layihələrə 140 milyon avro ayrılıb. Maliyyələşdirmə ərzaq, sığınacaq, təmiz su, səhiyyə və qış vaxtı mühafizə də daxil olmaqla təcili yardıma yönəldiləcək. Əsas prioritetlər Ukraynanın müharibədən güclü zərər çəkmiş bölgələrində həssas əhali qruplarının dəstəklənməsidir.

Bundan əlavə, Moldovada humanitar layihələrə 8 milyon avro ayrılıb. Dəstəyin əsas məqsədi ukraynalı qaçqınlara və onları qəbul edən Moldova icmalarına yardımın göstərilməsidir.