Ermənistan Müdafiə Nazirliyi təlimdən yayınma hallarının qarşısını almaq üçün yeni layihə hazırlayıb.

Axar.az xəbər verir ki, layihədə vətəndaşların təlim-məşq toplanışından yayınma formaları müəyyən edilib və toplanışdan yayınmaya görə məsuliyyət sərtləşdirilib.

Layihədə göstərilir ki, praktikada çağırışçıların təlim-məşq toplanışından yayınmaq üçün saxta xəstəlik arayışları alması ilə yanaşı, özlərinə bədən xəsarətləri yetirməsi halı da geniş yayılıb.

Yeni layihədə bu şəxslərin 2 ildən 5 ilədək həbs olunması təklif edilir.

Hərbi polisə isə hərbi komissarlığa və ya sağlamlıq müayinəsi və ya tibbi müayinə keçirən orqana gəlməmiş çağırışçıları müəyyən etmək, onları məcburi gətirmək və müvafiq hərbi komissarlığa təslim etmək, çağırışdan və ya hərbi təlim tədbirlərindən boyun qaçıran şəxslər haqqında məlumat toplamaq və qanunla müəyyən edilmiş qaydada müvafiq tədbirlər görmək hüququ verilib.