Tramp İordaniya kralı II Abdullahla görüşdən sonra Qəzza zolağını ələ keçirməkdə nə qədər ciddi olduğunu göstərdi.

Bu sözləri Axar.az-a açıqlamasında politoloq Turab Rzayev Trampın Qəzza zolağı ilə bağlı planlarını şərh edərkən deyib.

Politoloq bildirib ki, Tramp açıq şəkildə Qəzza zolağının ABŞ nəzarətində olmasında təkid edir:

“Hətta bu mövzu ilə bağlı mübahisəyə yer qoymadı. İordaniya kralı II Abdullah da ilkin mərhələdə xəstə olan 2000 nəfəri qəbul etmək məcburiyyətində qaldı, digər məsələləri isə Misir və Səudiyyə Ərəbistanı ilə məsləhətləşəcəyini bildirdi.

Görüşdə II Abdullahı sualları ilə sıxışdırmasından aydındır ki, Tramp bu məsələdə qətiyyətlidir. Həmçinin Tramp fələstinlilərin İordaniya və Misirə köçürülməsini məsələnin həlli kimi görür. Tramp burada beynəlxalq hüququ açıq şəkildə pozur. Həmin əraziləri faktiki özünə birləşdirməyə və etnik təmizləmə aparmağa çalışır. ABŞ-ın Yaxın Şərqdə möhkəmlənəcəyini, sülh gətirəcəyini anons edir. Əslində ölkələrin daxili məsələlərinə qarışır, yəni İordaniya və Misiri fələstinlilərə yer ayırmağı məcbur edir”.

Qeyd edək ki, ABŞ Prezidenti Tramp İordaniya kralı II Abdullah ilə görüşdən sonra Qəzza zolağını satın almadan əldə edəcəyini bildirib. O, fələstinlilərin Qəzza zolağından geri qayıtmaq hüququ olmadan qonşu ölkələrə köçürülməsini təklif edib.