Bu həftə Səudiyyə Ərəbistanında Rusiya və ABŞ arasında yeni danışıqlar mərhələsi planlaşdırılıb. Gözlənilir ki, tərəflər münaqişənin həlli və müharibənin başa çatdırılması üçün atılacaq yeni addımları müzakirə edəcəklər.

Axar.az xəbər verir ki, bu fikirləri "Kremlyovskaya tabakerka" Teleqram kanalı mənbələrinə istinadən yazıb.

“Bu danışıqlar ərəfəsində gözlənilməz bir məqam ortaya çıxıb. Məlum olub ki, Sergey Lavrov öz paralel xəttini aparır”, - kanal bildirib.

Qeyd olunub ki, Lavrov diplomatik xətt üzrə amerikalılarla rəsmi olmayan təmaslar qurur və vəziyyəti diqqətdə saxlamağa çalışır.

“Sergey Viktoroviç amerikalılara etibar etmir. Hakimiyyətdə müəyyən bir qrup var ki, Trampın üzərinə götürdüyü öhdəliklərə əməl edəcəyinə şübhə ilə yanaşır. Hazırda o, həddindən artıq şirin danışır, çox şey vəd edir və bu, narahatlıq doğurur,” - Lavrova yaxın mənbə kanala açıqlamasında deyib.

Onun sözlərinə görə, bu mövqeyi güc strukturlarının bəzi nümayəndələri də bölüşürlər. Onlar ehtimal edirlər ki, amerikalılar biznes layihələri və investisiyalar adı altında sadəcə olaraq Rusiya resurslarını və texnologiyalarını mənimsəyəcək və eyni zamanda Moskva ilə Pekini qarşı-qarşıya qoyacaqlar.