ABŞ-da Donald Trampın hakimiyyətə gəlməsi ilə biz maliyyə kapitalının dünyanın müxtəlif cəmiyyətlərində necə dominant hala gəldiyini görürük. Bu şəraitdə biz qlobal supergüclərin yox, regional supergüclərin olacağı bir vəziyyətlə üzləşəcəyik. Buna sübut odur ki, Rusiya özünü Aİİ-də regional supergüc kimi görür və bu formatda öz maraqlarını irəli sürür.

Axar.az xəbər verir ki, bu sözləri erməni ekspert Vahe Davtyan yeni konfiqurasiyaların Cənubi Qafqaza təsiri haqda danışarkən deyib.

“Çin də eyni məntiqlə fəaliyyət göstərir. Yaxın gələcəkdə biz üç geosiyasi mərkəzin - Vaşinqton, Moskva və Pekinin - qlobal iqtisadiyyat və milli maraqlara, proteksionist iqtisadi siyasətlərə əsaslanacaq yeni geoiqtisadi dünya nizamı yaradacaq konfiqurasiyaları görəcəyik”, - o bildirib.

Onun sözlərinə görə, bir sıra Avropa ölkələrinin (o cümlədən Almaniya, İtaliya, Slovakiya) liberal sistemdən orta sağçı sistemə dönüş etdiyi müşahidə edilir:

“Cənub-Şərqi Asiyada da eyni proseslər gedir, sağçı ideologiyaların güclənməsinə və milli dövlətin formalaşmasına yönəlmiş bu dəyişikliklər nəticəsində dünya suverenlik, ərazi bütövlüyü və bir-birinin işinə qarışmamaq prinsipi ilə 17-ci əsrdə qurulan Vestfaliya sazişləri sisteminə qayıda bilər”.