Avropa Şurasının prezidenti Antonio Kosta Səudiyyə Ərəbistanının Ciddə şəhərində ABŞ və Ukrayna nümayəndə heyətləri arasında aparılan danışıqların yekunları ilə bağlı açıqlama verib.

Axar.az xəbər verir ki, Kosta Ciddi görüşünü müsbət hadisə kimi dəyərləndirib.

“Biz bu gün Ciddədən ABŞ və Ukrayna arasında danışıqlara dair xəbərləri, o cümlədən atəşkəs razılaşması və ABŞ-dan kəşfiyyat məlumatlarının mübadiləsi və təhlükəsizlik yardımının bərpası təklifini alqışlayırıq. Bu, Ukraynada hərtərəfli, ədalətli və davamlı sülhə doğru addım ola biləcək müsbət hadisədir”, - A.Kosta bildirib.

O, növbəti addımı Rusiyanın atmalı olduğunu vurğulayıb:

“İndi top Rusiyanın meydanındadır. AB qarşıdan gələn sülh danışıqlarında öz tərəfdaşları ilə birlikdə tam rolunu oynamağa hazırdır”.

Qeyd edək ki, Ciddədə bu gün baş tutan danışıqlarda Ukrayna ABŞ-ın 30 günlük atəşkəs təklifini qəbul edib.

Ukraynaya hərbi yardımın dayandırılması barədə qərarı Donald Tramp 4 martda vermişdi.