Türkiyə 2024-cü ildə qaz idxalının 45%-dən çoxunu Rusiyadan həyata keçirib və ödənişləri "Qazprombank" vasitəsilə davam etdirəcək. Ankara ABŞ-dan Rusiyaya qarşı sanksiyalardan müvəqqəti azad olma müddətinin may ayına qədər uzadılmasına nail olub.

Axar.az xəbər verir ki, bu barədə “Blumberq” adını açıqlamayan türkiyəli rəsmiyə istinadla məlumat yayıb.

“Türkiyənin "Qazprombank"a qarşı sanksiyalardan azad olunma müddəti 20 martda başa çatmalı idi. Rusiyadan Türkiyəyə qaz tədarükü qış aylarında həyati əhəmiyyət daşıyıb və yayda da kritik olaraq qalacaq”, - məlumatda bildirilib.

Qeyd olunub ki, Türkiyənin maliyyə naziri Mehmet Şimşək və amerikalı həmkarı Skott Bessent arasında bir müddət əvvəl telefon danışığı aparılıb. Onlar sanksiyalar və iqtisadi-təhlükəsizlik məsələləri müzakirə ediblər:

“Bu danışıqlar Türkiyənin Rusiya əleyhinə sanksiyalardan müvəqqəti azad edilmə müddətinin bitməsinə az qalmış baş tutub”.