Aprelin 16-da Ukrayna Ali Radası hərbi vəziyyətin və ümumi səfərbərliyin müddətini 2025-ci il avqustun 6-dək uzadıb. Lakin o, 90 gündən tez ləğv oluna bilər.

Axar.az xəbər verir ki, bu barədə ukraynalı deputat Yeqor Çernev danışıb.

Onun sözlərinə görə, sülhün bərqərar olacağı təqdirdə hərbi vəziyyətin ləğvi barədə qərar verilə bilər:

“Ali Rada istənilən vaxt, istənilən gün toplaşa və hətta bu 90 günün bitməsini gözləmədən hərbi vəziyyətin ləğvi üçün səs verə bilər”.

Eyni zamanda, o vurğulayıb ki, müharibə hələ də davam edərkən hərbi vəziyyət ləğv edilərsə, bu, dövlət aparatının fəaliyyətini dəyişə bilər. Xüsusilə, belə bir qərar hərbi-mülki administrasiyaların işinə və Ukrayna ordusunun maliyyələşdirilməsinə təsir edəcək.