Vaşinqtonun Moskva ilə Ukrayna üzrə apardığı danışıqlarda əsas maraqları geosiyasi xarakter daşıya bilər. Bu isə İranı təbii ki, narahat edir.

Axar.az xəbər verir ki, bu barədə “Tayms” qəzetində politoloq Mark Qaleotti adı açıqlanmayan ABŞ milli təhlükəsizlik rəsmisinə istinadla yazıb.

Qaleottinin sözlərinə görə, əgər Moskva İran və ya Şimali Koreya ilə yaxın münasibətlərini qurban verməyə hazırdırsa, bu, Rusiyanın geosiyasi istiqamətini dəyişməyə hazır olduğuna işarə edir:

“Əgər Rusiya Tehrandan uzaqlaşmaq qərarına gəlsə və xüsusilə də İranın nüvə proqramı haqqında bildiyi məlumatları ABŞ-a ötürsə, bu, çox böyük bir razılaşma olar - hətta Ukraynanın təbii sərvətlərindən də daha əhəmiyyətli”.

Qaleotti həmçinin bildirib ki, Moskva və Vaşinqton arasında danışıqlar prosesinin zaman baxımından kritik mərhələyə gəlib çatdığı qəbul edilir:

“Hazırda hər iki tərəf “kim ilk addımı atacaq?” sualı ətrafında gözləmə mövqeyindədir”.