24 və 25 iyun tarixlərində Haaqada keçiriləcək NATO sammitində iştirakçılar diqqəti Ukraynanın alyansa üzvlüyündən çox, hərbi xərclərin artırılması və hərbi istehsalın gücləndirilməsi məsələlərinə yönəldəcəklər.

Axar.az xəbər verir ki, bu barədə “Blumberq” agentliyi mənbələrə istinadən yazıb.

Məlumata görə, sammit əvvəlki görüşlərə nisbətən daha qısa olacaq və yekununda kiçik bir bəyannamə qəbul ediləcək.

Qeyd olunur ki, NATO-ya üzv ölkələr 2032-ci ilə qədər hərbi xərcləri ÜDM-in 5 faizinə çatdırmaq üzərində işləyirlər. Bu, ABŞ Prezidenti Donald Trampın tələblərini yerinə yetirmək məqsədi daşıyır. Bu planlar alyansın xarici işlər nazirlərinin çərşənbə və cümə axşamı Türkiyədə keçiriləcək görüşündə müzakirə olunacaq. Agentlik qeyd edir ki, hazırda ABŞ da daxil olmaqla, alyansın 32 üzvündən heç biri 5 faizlik həddi aşmayıb.